##NARAYANEEYAM (Dasakas 31-40)##
##31 	The humbling of Bali##
prItyA daityastava tanumahaHprekShaNItsarvathA.api
tvAmArAdhyannajita rachayanna~njaliM sa~njagAda |
mattaH kiM te samabhilaShitaM viprasUno vada tvaM
vittaM bhaktaM bhavanamavanIM vApi sarvaM pradAsye || ##31-1##
tAmakShINAM baligiramupAkarNya kAruNyapUrNo.a\-
pyasyotsekaM shamayitumanA daityavaMshaM prashaMsan |
bhUmiM pAdatrayaparimitAM prArthayAmAsitha tvaM
sarvaM dehIti tu nigadite kasya hAsyaM na vA syAt || ##31-2##
vishveshaM mAM tripadamiha kiM yAchase bAlishastvaM
sarvAM bhUmiM vR^iNu kimamunetyAlapattvAM sa dR^ipyan |
yasmAddarpAttripadaparipUrtyakShamaH kShepavAdAn
bandhaM chAsAvagamadatadarho.api gADhopashAntyai || ##31-3##
pAdatrayyA yadi na mudito viShTapairnApi tuShye\-
dityukte.asminvarada bhavate dAtukAme.atha toyam |
daityAchAryastava khalu parIkShArthinaH preraNAttaM
mA mA deyaM harirayamiti vyaktamevAbabhAShe || ##31-4##
yAchatyevaM yadi sa bhagavAnpUrNakAmo.asmi so.ahaM
dAsyAmyeva sthiramiti vadan kAvyashapto.api daityaH |
vindhyAvalyA nijadayitayA dattapAdyAya tubhyaM
chitraM chitraM sakalamapi sa prArpayattoyapUrvam || ##31-5##
nissandehaM ditikulapatau tvayyasheShArpaNaM tad
vyAtanvAne mumuchurR^iShayaH sAmarAH puShpavarSham |
divyaM rUpaM tava cha tadidaM pashyatAM vishvabhAjA\-
muchchairuchchairavR^idhadavadhIkR^itya vishvANDabhANDam || ##31-6##
tvatpAdAgraM nijapadagataM puNDarIkodbhavo.asau
kuNDItoyairasichadapunAdyajjalaM vishvalokAn |
harShotkarShAt subahu khecharairutsave.asmin
bherIM nighnan-bhuvanamacharajjAmbavAn bhaktishAlI || ##31-7##
tAvaddaityAstvanumatimR^ite bharturArabdhayuddhA
devopetairbhavadanucharaiH sa~NgatA bha~NgamApan |
kAlAtmAyaM vasati purato yadvashAtprAgjitAH smaH
kiM vo yuddhairiti baligirA te.atha pAtAlamApuH || ##31-8##
pAshairbaddhaM patagapatinA daityamuchchairavAdI\-
stArttIyIkaM disha mama padaM kiM na vishveshvaro.asi |
pAdaM mUrdhni praNaya bhagavannityakampaM vadantaM
prahlAdastaM svayamupagato mAnayannastavIttvAm || ##31-9##
darpochChittyai vihitamakhilaM daitya siddho.asi puNyai-
rlokaste.astu tridivavijayI vAsavatvaM cha pashchAt |
matsAyujyaM bhaja cha punarityanvagR^ihNA baliM taM
vipraissantAnitamakhavaraH pAhi vAtAlayesha || ##31-10##

##32 	Matsya Avatar##
purA hayagrIvamahAsureNa ShaShThAntarAntodyadakANDakalpe |
nidronmukhabrahmamukhAt dR^iteShu vedeShvadhitsaH kila matsyarUpam || ##32-1##
satyavratasya dramiDAdhibharturnadIjale tarpayatastadAnIm |
karA~njalau sa~njvalitAkR^itistvamadR^ishyathAH kashchana bAlamInaH || ##32-2##
kShiptaM jale tvAM chakitaM vilokya ninye.anbupAtreNa muniH svageham |
svalpairahobhiH kalashIM cha kUpaM vApIM sarashchAnashiShe vibho tvam || ##32-3##
yogaprabhAvAdbhavadAj~nayaiva nItastatastvaM muninA payodhim |
pR^iShTo.amunA kalpadidR^ikShumenaM saptAhamAsveti vadannayAsIH || ##32-4##
prApte tvadukte.ahani vAridhArApariplute bhUmitale munIndraH |
saptarShibhiH sArdhamapAravAriNyudghUrNamAnaH sharaNaM yayau tvAm || ##32-5##
dharAM tvadAdeshakarImavAptAM naurUpiNImAruruhustadA te |
tatkampakampreShu cha teShu bhUyastvamambudherAvirabhUrmahIyAn || ##32-6##
jhaShAkR^itiM yojanalakShadIrghAM dadhAnamuchchaistaratejasaM tvAm |
nirIkShya tuShTA munayastvaduktyA tvattu~NgaShR^i~Nge taraNiM babandhuH || ##32-7##
AkR^iShTanauko munimaNDalAya pradarshayanvishvajagadvibhAgAn |
saMstUyamAno nR^ivareNa tena GYAnaM paraM chopadishannachArIH || ##32-8##
kalpAvadhau sapta munInpurovatprastApya satyavratabhUmipaM tam |
vaivasvatAkhyaM manumAdadhAnaH krodhAddhayagrIvamabhidruto.abhUH || ##32-9##
svatu~NgaShR^i~NgakShatavakShasaM taM nipAtya daityaM nigamAngR^ihItvA |
viri~nchaye prItahR^ide dadAnaH prabha~njanAgArapate prapAyAH || ##32-10##

##33 	The story of Ambarisha##
vaivasvatAkhyamanuputranabhAgajAta\-
nAbhAganAmakanarendrasuto.ambarIShuH |
saptArNavAvR^itamahIdayito.api reme
tvatsa~NgiShu tvayi cha magnamanAssadaiva || ##33-1##
tvatprItayesakalameva vitanvato.asya
bhaktyaiva deva nachirAdabhR^ithAH prasAdam |
yenAsya yAchanamR^ite.apyabhirakShaNArthaM
chakraM bhavAnpravitatAra sahasradhAram || ##33-2##
sa dvAdashIvratamatho bhavadarchanArthaM
varShaM dadhau madhuvane yamunopakaNThe |
patnyA samaM sumanasA mahatIM vitanvan
pUjAM dvijeShu visR^ijanpashuShaShTikoTim || ##33-3##
tatrAtha pAraNadine bhavadarchanAnte
durvAsasA.asya muninA bhavanaM prapede |
bhoktuM vR^itashcha sa nR^ipeNa parArtishIlo
mandaM jagAma yamunAM niyamAnvidhAsyan || ##33-4##
rAj~nAtha pAraNamuh~NrtasamAptikhedA-
dvAraiva pAraNamakAri bhavatpareNa |
prApto munistadatha divyadR^ishA vijAnan
kShipyan kR^idhoddhR^itajaTo vitatAna kR^ityAm || ##33-5##
kR^ityAM cha tAmasidharAM bhuvanaM dahantI\-
magre.abhivIkShya nR^ipatirna padAchchakampe |
tvadbhaktabAdhamabhivIkShya sudarshanaM te
kR^ityAnalaM shalabhayanmunimanvadhAvIt || ##33-6##
dhAvannasheShabhuvaneShu bhiyA sa pashyan
vishvatra chakramapi te gatavAnviri~ncham |
kaH kAlachakramatila~NghayatItyapAstaH
sharvaM yayau sa cha bhavantamavandataiva || ##33-7##
bhUyo bhavannilayametya muniM namantaM
proche bhavAnahamR^iShe nanu bhaktadAsaH |
j~nAnaM tapashcha vinayAnvitameva mAnyaM
yAhyambarIShapadameva bhajeti bhUman || ##33-8##
tAvatsametya muninA sa gR^ihItapAdo
rAjA.apasR^itya bhavadastramasAvanauShIt |
chakre gate muniradAdakhilAshiSho.asmai
tvadbhaktimAgasi kR^ite.api kR^ipAM cha shaMsan || ##33-9##
rAjA pratIkShya munimekasamAmanAshvAn
sambhojya sAdhu tamR^iShiM visR^ijanprasannam |
bhuktvA svayaM tvayi tato.api dR^iDhaM rato.abhUt
sAyujyamApa cha sa mAM pavanesha pAyAH || ##33-10##

##34 	Sri Rama Avatar##
gIrvANairarthyamAno dashamukhanidhanaM kosale.aShvR^ishyaShR^i~Nge
putrIyAmiShTimiShTvA daduShi dasharathakShmAbhR^ite pAyasAgryam |
tadbhuktyA tatpurandhrIShvapi tisR^iShu samaM jAtagarbhAsu jAto
rAmastvaM lakShmaNena svayamatha bharatenApi shatrughnanAmnA || ##34-1##
kodaNDI kaushikasya kratuvaramavituM lakShmaNenAnuyAto
yAto.abhUstAtavAchA munikathitamanudvandvashAntAdhvakhedaH |
nR^INAM trANAya bANairmunivachanabalAttATakAM pATayitvA
labdhvAsmAdastrajAlaM munivanamagamo deva siddhAshramAkhyam || ##34-2##
mArIchaM drAvayitvA makhashirasi sharairanyarakShAMsi nighnan
kalyAM kurvannahalyAM pathi padarajasA prApya vaidehageham |
bhindAnashchAndrachUDaM dhanuravanisutAmindirAmeva labdhvA
rAjyaM prAtiShThathAstvaM tribhirapi cha samaM bhrAtR^ivIraiH sadAraiH || ##34-3##
ArundhAne ruShAndhe bhR^igukulatilake saMkramayya svatejo
yAte yAto.asyayodhyAM sukhamiha nivasankAntayA kAntamUrte |
shatrughnenaikadAtho gatavati bharate mAtulasyAdhivAsaM
tAtArabdho.abhiShekastava kila vihataH kekayAdhIshaputryA || ##34-4##
tAtoktyA yAtukAmo vanamanujavadhUsaMyutashchApadhAraH
paurAnArUdhya mArge guhanilayagatastvaM jaTAchIradhArI |
nAvA santIrya ga~NgAmadhipadavi punastaM bharadvAjamArA\-
nnatvA tadvAkyahetoratisukhamavasashchitrakUTe girIndre || ##34-5##
shrutvA putrArtikhinnaM khalu bharatamukhAt svargayAtaM svatAtaM
tapto dattvAmbu tasmai nidadhitha bharate pAdukAM medinIM cha |
atriM natvAtha gatvA vanamativipulAM daNDakAM chaNDakAyaM
hatvA daityaM virAdhaM sugatimakalayashchAru bhoH shArabha~NgIm || ##34-6##
natvA.agastyaM samastAsharanikarasapatrAkR^itiM tApasebhyaH
pratyashrauShIH priyaiShI tadanu cha muninA vaiShNave divyachApe |
brahmAstre chApi datte pathi pitR^isuhR^idaM dIkShya jaTAyuM
modAdgodAtaTAnte pariramasi purA pa~nchavaTyAM vadhUTyA || ##34-7##
prAptAyAH shUrpaNakhyA madanachaladhR^iterarthanairnissahAtmA
tAM saumitrau visR^ijya prabalatamaruShA tena nirlunanAsAm |
dR^iShTvainAM ruShTachittaM kharamabhipatitaM duShaNaM cha trimUrdhaM
vyAhiMsIrAsharAnapyayutasamadhikAMstatkShaNAdakShatoShmA || ##34-8##
sodaryAproktavArtAvivashadashamukhAdiShTamArIchamAyA\-
sAra~NgaM sArasAkShyA spR^ihitamanugataH prAvadhIrbANaghAtam |
tanmAyAkrandaniryApitabhavadanujAM rAvaNastAmahArShIt
tenArto.api tvamantaH kimapi mudamadhAstadvadhopAyAyalAbhAt || ##34-9##
bhUyastanvIM vichinvannahR^ita dashamukhastvadvadhUM madvadhene\-
tyuktvA yAte jaTAyau divamatha suhR^idaH prAtanoH pretakAryam |
gR^ihNAnaM taM kabandhaM jaghanitha shabarIM prekShya pampAtaTe tvaM
samprApto vAtasUnuM bhR^ishamuditamanAH pAhi vAtAlayesha || ##34-10##

##35 	Sri Rama Avatar (contd)##
nItassugrIvamaitrIM tadanu dundubheH kAyamuchchaiH
kShiptvA~NguShThena bhUyo lulavitha yugapatpatriNA sapta sAlAn |
hatvA sugrIvaghAtodyatamatulabalaM vAlinaM vyAjavR^ittyA
varShAvelAmanaiShIrvirahataraLitastvaM mata~NgAshramAnte || ##35-1##
sugrIveNAnujoktyA sabhayamabhiyatA vyUhitAM vAhinIM tA\-
mR^ikShANAM vIkShya dikShu drutamatha dayitAmArgaNAyAvanamrAm |
sandeshaM chAngulIyaM pavanasutakare prAdisho modashAlI
mArge mArge mamArge kapibhirapi tadI tvatpriyA saprayAsaiH || ##35-2##
tvadvArtAkarNanodyadgarudurujavasampAtisampAtivAkya\-
prottIrNArNodhirantarnagari janakajAM vIkShya dattvA.a~NgulIyam |
prakShudyodyAnamakShakShapaNachaNaraNaH soDhabandho dashAsyaM
dR^iShTvA pluShTvA cha la~NkAM jhaTiti sa hanumAnmauliratnaM dadau te || ##35-3##
tvaM sugrIvA~NgadAdiprabalakapichamUchakravikrAntabhUmI\-
chakro.abhikramya pArejaladhi nishicharendrAnujAshrIyamANaH |
tatproktAM shatruvArtAM rahasi nishamayanprArthanApArthyaroSha\-
prAstAgneyAstratejastrasadudadhigirA labdhavAnmadhyamArgam || ##35-4##
kIshairAshAntaropAhR^itagirinikaraiH setumAdhApya yAto
yAtUnyAmardya daMShTrAnakhashikharishilAsAlashastraiH svasainyaiH |
vyAkurvansAnujastvaM samarabhuvi paraM vikramaM shakrajetrA
vegAnnAgAstrabaddhaH patagapatigarunmArutairmochito.abhUH || ##35-5##
saumitristvatra shaktiprahR^itigaLadasurvAtajAnItashaila\-
ghrANAtpraNAnupeto vyakR^iNuta kusR^itishlAghinaM meghanAdam |
mAyAkShobheShu vaibhIShaNavachanahR^itastambhanaH kumbhakarNaM
samprAptaM kampitorvItalamakhilachamUbhakShiNaM vyakShiNostvam || ##34-6##
gR^ihNan jambhArisampreShitarathakavachau rAvaNenAbhiyudhyan
brahmAstreNAsya bhindan gaLatatimabalAmagnishuddhAM pragR^ihNan |
deva shreNIvarojjIvitasamaramR^itairakShatairR^ikShasa~Nghair\-
la~NkAbhartrA cha sAkaM nijanagaramagAH sapriyaH puShpakeNa || ##35-7##
prIto divyAbhiShekairayutasamadhikAnvatsarAnparyaraMsI\-
rmaithilyAM pApavAchA shiva shiva kila tAM garbhiNImabhyahAsIH |
shatrughnenArdayitvA lavaNanishicharaM prArdayaH shUdrapAshaM
tAvadvAlmIkigehe kR^itavasatirupAsUta sItA sutau te || ##35-8##
vAlmIkestvatsutodgApitamadhurakR^iterAj~nayA yaj~navATe
sItAM tvayyAptukAme kShitimavishadasau tvaM cha kAlArthito.abhUH |
hetoH saumitrighAtI svayamatha sarayUmagnanishsheShabhR^ityaiH
sAkaM nAkaM prayAto nijapadamagamo deva vaikuNThamAdyam ||## 35-9##
so.ayaM martyAvatArastava khalu niyataM martyashikShArthamevaM
vishleShArtirnirAgastyajanamapi bhavetkAmadharmAtisaktyA |
no chetsvAtmAnubhUteH kvanu tava manaso vikriyA chakrapANe
sa tvaM sattvaikamUrte pavanapurapate vyAdhunu vyAdhitApAn || ##35-10##

##36 	Parasurama Avatar##
atreH putratayA purA tvamanasUyAyAM hi dattAbhidho
jAtaH shiShyAniShandhatandritamanAH svasthashcharankAntayA |
dR^iShTo bhaktatamena hehayamahIpAlena tasmai varA\-
naShTaishvaryamukhAnpradAya daditha svenaiva chAnte vadham || ##36-1##
satyaM kartumathArjunasya cha varaM tachChaktimAtrAnataM
brahmadveShi tadAkhilaM nR^ipakulaM hantuM cha bhUmerbharam |
sa~njAto jamadagnito bhR^igukule tvaM reNukAyAM hare
rAmo nAma tadAtmajeShvavarajaH pitroradhAH sammadam || ##36-2##
labdhAmnAyagaNashchaturdashavayAH gandharvarAje manA\-
gAsaktAM kila mAtaraM prati pituH krodhAkulasyAj~nayA |
tAtAj~nAtigasodaraiH samamimAM ChitvAtha shAntAtpitu\-
steShAM jIvanayogamApitha varaM mAtA cha te.adAdvaran || ##36-3##
pitrA mAtR^imude stavAhR^itaviyaddhenornijAdAshramAt
prasthAyAtha bhR^igorgirA himagirAvArAdhya gaurIpatim |
labdhvA tatparashuM taduktadanujachChedI mahAstrAdikaM
prApto mitramathAkR^itavR^iaNamuniM prApyAgamaH svAshramam || ##36-4##
AkheTepagato.arjunaH suragavIsamprAptasampadgaNai\-
stvatpitrA paripUjitaH puragato durmantrivAchA punaH |
gAM kretuM sachivaM nyayu~Nkta kudhiyA tenApi rundhanmuni\-
prANakShepasaroShagohatachamUchakreNa vatso hR^itaH || ##36-5##
shukrojjIvitatAtavAkyachalitakrodho.atha sakhyA samaM
bibhruddhyAtamahodaropanihitaM chApaM kuThAraM sharan |
ArUDhaH sahavAhayantR^ikarathaM mAhiShmatImAvishan
vAgbhirvatsamadAshuShi kShitipatau samprAstuthAH sa~Ngaram || ##36-6##
putrANAmayutenasaptadashabhishchAkShauhiNIbhirmahA\-
senAnIbhiranekamitranivahirvyAjR^imbhitIyodhanaH |
sadyastvatkakuThArabANavidalannishsheShasainyotkaro
bhItipradrutanaShTashiShTanayastvAmApataddhehayaH || ##36-7##
lIlAvAritanarmadAjalavalalla~NkeshagarvApaha\-
shrImadbAhusahasramuktabahushastrAstraM nirundhannamum |
chakre tvayyatha vaiShNave.api vikale budhvA hariM tvAM mudA
dhyAyantaM ChitasrvadoShamavadhIH so.agAtparaM te padam || ##36-8##
bhUyo.amarShitahehayAtmajagaNaistAte hate reNukA\-
mAghnAnAM hR^idayaM nirIkShya bahusho ghorAM pratij~nAM vahan |
dhyAnAnItarathAyudhastvamakR^ithA vipradruhaH kShatriyAn
dik{}chakreShu kuThArayanvishikhayan niHkShAtriyAM medinIm || ##36-9##
tAtojjIvanakR^in{}nR^ipAlakakulaM triHsaptakR^itvo jayan
santarpyAtha samantapa~nchakamahAraktahR^idaudhe pitR^In |
yaj~ne kShmAmapi kAshyapAdiShu dishan sAlvena yudhyan punaH
kR^iShNo.amuM nihaniShyatIti shamito yuddhAt kumArairbhavAn || ##36-10##
nyasyAstrANi mahendrabhUbhR^iti tapastanvanpunarmajjitAM
gokarNAvadhi sAgareNa dharaNIM dR^iShTvArthitastApasaiH |
dhyAteShvAsaghR^itAnalAstrachakitaM sindhuM sR^ivakShepaNA\-
dutsAryoddhR^itakeraLo bhR^igupate vAtesha saMrakSha mAm || ##36-11##

##37 	The prelude to the incarnation as Krishna##
sAndrAnanandatano hare nanu purA daivAsure sa~Ngare
tvatkR^ittA api karmasheShavashato ye te na yAtA gatim |
teShAM bhUtalajanmanAM ditibhuvAM bhAreNa durArditA
bhUmiH prApa viri~nchamAshritapadaM devaiH puraivAgataiH || ##37-1##
hA hA durjanabhUribhAramathitAM pAthonidhau pAtukAm\-
etAM pAlaya hanta me vivashatAM saMpR^ichCha devAnimAn |
ityAdiprachurapralApavivashAmAlokya dhAtA mahIM
devAnAM vadanAni vIkShya parito dadhyau bhavantaM hare || ##37-2##
Uche chAmbujabhUramUnayi surAH satyaM dharitryA vacho
nanvasyA bhavatAM cha rakShaNavidhau dakSho hi lakShmIpatiH |
sarve sharvapurassarA vayamito gatvA payovAridhiM
natvA taM stumahe javAditi yuyaH sAkaM tavA,aketanam || ##37-3##
te mugdhAnilashAlidugdhajaladhestIraM gatAH sa~NgatA
yAvattvatpadachintanaikamanasastAvatsa pAthojabhUH |
tvadvAchaM hR^idaye nishamya sakalAnAnandayannachivA\-
nAkhyAtaH paramAtmanA svayamahaM vAkyaM tadAkarNyatAm || ##37-4##
jAne dInadashAmahaM diviShadAM bhUmeshcha bhImairnR^ipai\-
statkShepAya bhavAmi yAdavakule so.ahaM samagrAtmanA |
devA vR^iShNikule bhavantu kalayA devA~NganAshchAvanau
matsevArthamiti tvadIyavachanaM pAthojabhUrUchivAn || ##37-5##
shrutvA karNarasAyanaM tava vachaH sarveShu nirvApita\-
svAnteShvIsha gateShui tAvakakR^ipApIyUShatR^iptAtmasu |
vikhyAte mathurApure kila bhavatsAnnidhyapuNyottare
dhanyAM devakanandinImudavahadrAjA sa shUrAtmajaH || ##37-6##
udvAhAvasitau tadIyasahajaH kaMso.atha sammAnaya\-
nnetau sUtatayA gataH pathi rathe vyomotthayA tvadgirA |
asyAstvAmatiduShTamaShTamasuto hanteti hanteritaH
sattrAsAtsa tu hantumantikagatAM tanvIM kR^ipANImadhAt || ##37-7##
gR^ihNAnashchikureShu tAM khalamatiH shaureshchiraM sAntvanai\-
rno mu~nchanpunarAtmajArpaNagirA prIto.atha yAto gR^ihAn |
AdyaM tvatsahajaM tathArpitamapi snehena nAhannasau
duShTAnAmapi deva puShTakaruNA dR^iShTA hi dhIrekadA || ##37-8##
tAvattvanmanasaiva nAradamuniH proche sa bhojeshvaraM
yUyaM nanvasurAH surAshcha yadavo jAnAsi kiM na prabho |
mAyAvI sa harirbhavadvadhakR^ite bhAvI suraprArthanA\-
dityAkarNya yadUnadUdhunadasau shaureshcha sUnUnahan || ##37-9##
prApte saptamagarbhatAmahipatau tvatpreraNAnmAyayA
nIte mAdhava rohiNIM tvamapi bhoH sachchitsukhaikAtmakaH |
devakyA jaTharaM viveshitha vibho saMstUyamAnassuraiH
sa tvaM kR^iShNa vidhUya rogapaTalIM bhaktiM parAM dehi me || ##37-10##

##38 	The birth of Sri Krishna##
AnandarUpa bhagavannayi te.avatAre
prApte pradIptabhavada~Nga nirIyamANaiH |
kAntivrajairiva ghanAghanamaNDalairdyA\-
mAvR^iNvatI viruruche kila varShavelA || ##38-1##
AshAsu shItalatarAsu payodatoyai\-
rAshAsitAptivivasheShu cha sajjaneShu |
naishAkarodayavidhau nishi madhyamAyAM
kleshApahastrijagatAM tvamihA.avirAsIH || ##38-2##
bAlyasR^ishApi vapuShA dadhuShA vibhUtI\-
rudyatkirITakaTakA~NgadahArabhAsA |
sha~NkhArivArijagadAparibhAsitena
meghAsitena parilesitha sUtigehe || ##38-3##
vakShaHsthalIsukhanilAnavilAsilakShmI\-
mandAkShalakShitakaTAkShavimokShabhedaiH |
tanmandirasya khalakaMsakR^itAmalakShmI\-
munmArjayanniva virejitha vAsudeva || ##38-4##
shauristu dhIramunimaNDalachetaso.api
dUrasthitaM vapurudIkShya nijekShaNAbhyAm |
AnandabaShpapuLakodgamagadgadArdra\-
stuShTAva dR^iShTimakarandarasaM bhavantam || ##38-5##
deva prasIda parapUruSha tApavallI\-
nirlUnadAtra samanetra kalAvilAsin |
khedAnapAkuru kR^ipAgurubhiH kaTAkShair\-
ityAdi tena muditena chiraM nuto.abhUH || ##38-6##
mAtrA cha netrasalilAstR^itagAtravallyA
stotrairabhiShTutaguNaH karuNAlayastvam |
prAchInajanmayugaLaM pratibodhya tAbhyAM
mAturgirA dadhitha mAnuShabAlaveSham || ##38-7##
tvatpreristatadanu nandatanUjayA te
vyatyAsamArachayituM sa hi shUrasUnuH |
tvAM hastayoradhR^ita chittAvidhAryamAryai\-
rambhoruhasthakaLahaMsakishoraramyam || ##38-8##
jAtA tadA pushupasadmani yoganidrA
nidrAvimudritamathAkR^ita pauralokam |
tvatpreraNAtkimiha chitramachetanairyad
dvAraiH svayaM vyaghaTi sa~NgaTitaissugADham || ##38-9##
sheSheNa bhUriphaNavAritavAriNA.atha
svairaM pradarshitapatho maNidIpitena |
tvAM dhArayan sa khalu dhanyatamaH pratasthe
so.ayaM tvamIsha mama nAshaya rogavegAn || ##38-10##

##39 	Bringing Yogamaya from Gokulam etc##
bhavantamayamudvahan yadukulodvaho nissaran
dadarsha gaganochchalajjalabharAM kalindAtmajAm |
ahi salilasa~nchayaH sa punaraindrajAlodito
jalaugha iva tatkShaNAtprapadameyatAmAyayau || ##39-1##
prasuptapashupAlikAM nibhR^itamArudadbAlikA\-
mapAvR^itakavATikAM pashupavATikAmAvishan |
bhavantamayamarpayan prasavatalpake tatpadA-
dvahan kapaTakanyakAM svapuramAgato vegataH || ##39-2##
tatastvadanujAravakShapitanidravegadrava\-
dbhaTotkaraniveditaprasavavArtayaivArtimAn |
vimuktachikurotkarastvaritamApatan bhojarA\-
DatuShTa iva dR^iShTavAn bhaginikAkare kanyakAm || ##39-3##
dhruvaM kapaTashAlino madhuharasya mAyA bhave\-
dasAviti kishorikAM bhaginikAkarAli~NgitAm |
dvipo naLinikAntarAdiva mR^iNALikAmAkShipa\-
nnayaM tvadanujAmajAmupalapaTTake piShTavAn || ##39-4##
tato bhavadupAsako jhaTiti mR^ityupAshAdiva
pramuchya tarasaiva sA samadhirUDharUpAntarA |
adhastalamajagmuShI vikasadaShTabAhusphuran\-
mahAyudhamaho gatA kila vihAyasA didyute || ##39-5##
nR^ishaMsatara kaMsa te kimu mayA viniShpiShTayA
babhUva bhavadantakaH kvachana chintyatAM te hitam |
iti tvadanujA vibho khalamudIrya taM jagmuShI
marudgaNapaNAyitA bhuvi cha mandirANyeyuShI || ##39-6##
prage punaragAtmajAvachanamIritA bhUbhujA
pralambabakapUtanApramukhadAnavA mAninaH |
bhavannidhanakAmyayA jagati babhramurnirbhayAH
kumArakavimArakAH kimiva duShkaraM niShkR^ipaiH || ##39-7##
tataH pashupamandire tvayi mukunda nandapriyA\-
prasUtishayaneshaye rudati ki~nchida~nchatpade |
vibudhya vanitAjanaistanayasaMbhave ghoShite
mudA kimu vadAmyaho sakalamAkulaM gokulam || ##39-8##
aho khalu yashodayA navakaLAyachetoharaM
bhavantamalamantike prathamamapibantyA dR^ishA |
punaH stanabharaM nijaM sapadi pAyayantyA mudA
manoharatanuspR^ishA jagati puNyavanto jitAH || ##39-9##
bhavatkushalakAmyayA sa khalu nandagopastadA
pramodabharasa~Nkule dvijakulAya kiM nAdadAt |
tathaiva pashupAlakAH kimu na ma~NgalaM tenire
jagatritayama~Ngala tvamiha pAhi mAmAmayAt || ##39-10##

##40 	The salvation of Putana##
tadanu nandamamandashubhAspadaM nR^ipapurIM karadAnakR^ite gatam |
samavalokya jagAdbhavatpitA viditakaMsasahAyajanodyamaH || ##40-1##
ayi sakhe tava bAlakajanma mAM sukhayate.adya nijAtmajajanmavat |
iti bhavatpitR^itAM vrajanAyake samadhiropya shashaMsa tamAdarAt || ##40-2##
iha cha santyanimittashatAni te kaTakasImne tato laghu gamyatAm |
iti cha tadvachasA vrajanAyako bhavadapAyabhiyA drutamAyayau || ##40-3##
avasare khalu tatra cha kAchana vrajapade madhurAkR^itira~NganA |
taraLaShaTpadalAlitakuntalA kapaTapotaka te nikaTaM gatA || ##40-4##
sapadi sA hR^itabAlakachetanA nishicharAnvayajA kila pUtanA |
vrajavadhUShviha keyamiti kShaNaM vimR^ishatIShu bhavantamupAdade || ##40-5##
lalitabhAvavilAsahR^itAtmabhiryuvatibhiH pratiroddhumapAritA |
stanamasau bhavanAntaniSheduShI pradaduShI bhavate kapaTAtmane || ##40-6##
samadhiruhya tada~Nkamasha~Nkitastvamatha bAlakalopanaroShitaH |
mahadivAmraphalaM kuchamaNDalaM pratichuchUShitha durviShadUShitam || ##40-7##
asubhireva samaM dhayati tvayi stanamasau stanitopamanisvanA |
nirapatadbhayadAyi nijaM vapuH pratigatA pravisArya bhujAvubhau || ##40-8##
bhayadaghoShaNabhIShaNavigrahashravaNadarshanamohitavallave |
vrajapade taduraHsthalakhelanaM nanu bhavantamagR^ihNata gopikAH || ##40-9##
bhuvanama~NkalanAmabhireva te yuvatibhirbahudhA kR^itarakShaNaH |
tvamayi vAtaniketananAtha mAmagadayan kuru tAvakasevakam || ##40-10##