##NARAYANEEYAM (Dasakas 81-90)## ##81 The slaying of Narakasura## snigdhAM mugdhAM satatamapi tAM lAlayan satyabhAmAM yAto bhUyaH saha khalu tayA yAj~nasenIvivAham | pArthaprItyai punarapi manAgAsthito hastipuryAM shakraprasthaM puramapi vibho saMvidhAyAgato.abhUH ||##81-1## bhadrAM bhadrAM bhavadavarajAM kauraveNArthyamAnAM tvadvAchA tAmahR^ita kuhanAmaskarI shakrasUnuH | tatra kruddhaM balamanunayan pratyagAstena sArdhaM shakraprasthaM priyasakhamude satyabhAmAsahAyaH ||##81-2## tatra krIDannapi cha yamunAkUladR^iShTAM gR^ihItvA tAM kAlindIM nagaramagamaH khANDavaprINitAgniH | bhrAtR^itrastAM praNayavivashAM deva paitR^iShvaseyIM rAj~nAM madhye sapadi jahR^iiShe mitravindAmavantIm ||##81-3## satyAM gatvA punarudavaho nagnajinnandanAM tAM badhvA saptApi cha vR^iShavarAnsaptamUrtirnimeShAt | bhadrAM nAma pradaduratha te deva santarddanAdyA\- statsodaryAM varada bhavataH sApi paitR^iShvaseyI ||##81-4## pArthAdyairapyakR^italavanaM toyamAtrAbhilakShyaM lakShaM ChitvA shapharamavR^ithA lakShaNAM madrakanyAm | aShTAvevaM tava samabhavan vallabhAstatra madhye shushrotha tvaM surapatigirA bhaumadushcheShTitAni ||##81-5## smR^itAyAtaM pakShipravaramadhirUDhastvamagamo vahanna~Nke bhAmAmupavanamivArAtibhavanam | vibhindan durgANi truTitapR^itanAshonitarasaiH puraM tAvat prAgjyotiShamakuruthAshshoNitapuram ||##81-6## murastvAM pa~nchAsyo jaladhivanamadhyAdudapatat sa chakre chakreNa pradalitashirA ma~NkShu bhavatA | chatudantairdantAvalapatibhirindhAnasamaraM rathA~NkenachChitvA narakamakarostIrNarakam ||##81-7## stuto bhUmyA rAjyaM sapadi bhagadatte.asya tanaye gaja~nchaikaM dattvA prajighAyitha nAgAnnijapurIm | khalenAbaddhAnAM svagatamanasAM ShoDasha punaH sahasrANi strINAmapi cha dhanarAshiM cha vipulam ||##81-8## bhaumApAhR^itakuNDalaM tadaditerdAtuM prayAto divaM shakrAdyairmahitaH samaM dayitayA dyustrIShu dattahriyA | hR^itvA kalpataruM ruShAbhipatitaM jitvendramabhyAgama\- stattu shrImadadoSha IdR^isha iti vyAkhyAtumevAkR^ithAH ||##81-9## kalpadruM satyabhAmAbhavanabhuvi sR^ijandvyaShTasAhasrayoShAH svIkR^itya pratyagAraM vihitabahuvapurlAlayankelibhedaiH | AshcharyAnnAradAlokitavividhagatistatra tatrApi gehe bhUyaH sarvAsu kurvan dasha dasha tanayAn pAhi vAtAlayesha ||##81-10## ##82 The fight with Baana etc ## pradyumno raukmiNeyaH sa khalu tava kalA shambareNAhR^itastaM hatvA ratyA sahApto nijapuramaharadrukmikanyAM cha dhanyAm | tatputro.athAniruddho guNanidhiravahadrochanAM rukmipautrIM tatrodvAhe gatastvaM nyavadhi musalinA rukmyapi dyUtavairAt ||##82-1## bANasya sA balisutasya sahasrabAhormAheshvarasya mahitA duhitA kiloShA | tvatpautramenamaniruddhamadR^iShTapUrvaM svapne.anubhUya bhagavan virahAturA.abhUt ||##82-2## yoginyatIva kushalA khalu chitralekhA tasyAH sakhI vilikhatI taruNAnasheShAn | tatrAniruddhamuShayA viditaM nishAyA\- mAneShTa yogabalato bhavato niketAt ||##82-3## kanyApure dayitayA sukhamAramantaM chainaM katha~nchana babandhuShi sharvabandhau | shrInAradoktatadudantadurantaroShaistvaM tasya shoNitapuraM yadubhirnyarundhAH ||##82-4## purIpAlaH shailapriyaduhitR^inAtho.asya bhagavAn samaM bhUtavrAtairyadubalamasha~NkaM nirurudhe | mahAprANo bANo jaTiti yuyudhAnena yuyudhe guhaH pradyumnena tvamapi purahantrA jaghaTiShe ||##82-5## niruddhAsheShAstre mumuhuShi tavAstreNa girishe drutA bhUtA bhItAH pramathakulavIrAH pramathitAH | parAskandatskandaH kusumasharabANaishcha sachivaH sa kumbhANDo bhANDaM navamiva balenAshu bibhide ||##82-6## chApAnAM pa~nchashatyA prasabhamupagate ChinnachApe.atha bANe vyarthe yAte sameto jvarapatirashanairajvari tvajjvareNa | j~nAnI stutvAtha dattvA tava charitajuShAM vijvaraM sajvaro.agAt prAyo.antarj~nAnavanto.api cha bahutamasA raudracheShTA hi raudrAH ||##82-7## bANaM nAnAyudhograM punarabhipatitaM durpadoShAdvitanvan nirlUnAsheShadoShaM sapadi bubudhuShA sha~NkareNopagItaH | tadvAchA shiShTabAhudvitayamubhayato nirbhayaM tatpriyaM taM muktvA taddattamAno nijapuramagamaH sAniruddhaH sahoShaH ||##82-8## muhustAvachChakraM varuNamajayo nandaharaNe yamaM bAlAnItau davadahanapAne.anilasakham | vidhiM vatsasteye girishamiha bANasya samare vibho vishvotkarShI tadayamavatAro jayati te ||##82-9## dvijaruShA kR^ikalAsavapurdharaM nR^iganR^ipaM tridivAlayamApayan | nijajane dvijabhaktimanuttamAmupadishan pavaneshvara pAhi mAm ||##82-10## ##83 The slaying of Paundraka ## rAme.athagokulagate pramadAprasakte hUtAnupetayamunAdamane madAndhe | svairaM samAramati sevakavAdamUDho dUtaM nyayu~Nkta tava pauNDrakavAsudevaH ||##83-1## nArAyaNo.ahamavatIrNa ihAsmi bhUmau dhatse kila tvamapi mAmakalakShaNAni | utsR^ijya tAni sharaNaM vraja mAmiti tvAM dUto jagAda sakalairhasitaH sabhAyAm ||##83-2## dUte.atha yAtavati yAdavasainikastvaM yAto dadarshitha vapuH kila pauNDrakIyam | tApena vakShasi kR^itA~NkamanalpamUlya\- shrIkaustubhaM makarakuNDalapItachelam ||##83-3## kAlAyasaM nijasudarshanamasyato.asya kAlAnalotkarakireNa sudarshanena | shIrShaM chakartitha mamarditha chAsya senAM tanmitrakAshipashiro.api chakartha kAshyAm ||##83-4## jADyena bAlakagirA.api kilAhameva shrIvAsudeva iti rUDhamatishchiraM saH | sAyujyameva bhavadaikyadhiyA gato.abhUt ko nAma kasya sukR^itaM kathamityaveyAt ||##83-5## kAshIshvarasya tanayo.atha sudakShiNAkhyaH sharvaM prapUjya bhavate vihitAbhichAraH | kR^ityAnalaM kamapi bANaraNAtibhItairbhUtaiH katha~nchana vR^itaiH samamabhyamu~nchat ||##83-6## tAlapramANacharaNAmakhilaM dahantIM kR^ityAM vilokya chakitaiH kathito.api pauraiH | dyUtotsave kamapi no chalito vibho tvaM pArshvasthamAshu visasarjitha kAlachakram ||##83-7## abhyApatatyamitadhAmni bhavanmahAstre hA heti vidrutavatI khalu ghorakR^ityA | roShAtsudakShiNamadakShiNacheShTitaM taM puploSha chakramapi kAshipurAmadhAkShIt ||##83-8## sa khalu vivido rakShoghAte kR^itopakR^itiH purA tava tu kalayA mR^ityuM prAptuM tadA khalatAM gataH | narakasachivo deshakleshaM sR^ijan nagarAntike jhaTiti halinA yudhyannaddhA papAta talAhataH ||##83-9## sAmbaM kauravyaputrIharaNaniyamitaM sAntvanArthI kurUNAM yAtastadvAkyaroShoddhR^itakarinagaro mochayAmAsa rAmaH | te ghAtyAH pANDaveyairiti yadupR^itanAM nAmuchastvaM tadAnIM taM tvAM durbodhalIlaM pavanapurapate tApashAntyai niSheve ||##83-10## ##84 Pilgrimage to Samantapanchaka ## kvachidatha tapanoparAgakAle puri nidadhatkR^itavarmakAmasUnU | yadukulamahiLAvR^itaH sutIrthaM samupagato.asi samantapa~nchakAkhyam ||##84-1## bahutarajanatAhitAya tatra tvamapi punanvinimajjya tIrthatoyaM | dvijagaNaparimuktavittarAshiH samamiLathAH kurupANDavAdimitraiH ||##84-2## tava khalu dayitAjanaiH sametA drupadasutA tvayi gADhabhaktibhArA | taduditabhavadAhR^itiprakArairatimumude samamanyabhAminIbhiH ||##84-3## tadanu cha bhagavan nirIkShya gopAnatikutukAdupagamya mAnayitvA | chirataravirahAturA~NgarekhAH pashupavadhUH sarasaM tvamanvayAsIH ||##84-4## sapadi cha bhavadIkShaNotsavena pramuShitamAnahR^idAM nitambinInAm | atirasaparimuktaka~nchulIke parichayahR^idyatare kuche nyalaiShIH ||##84-5## ripujanakalahaiH punaH punarme samupagatairiyatI vilamban.aAbhUt | iti kR^itaparirambhaNe tvayi drAgativivashA khalu rAdhikA nililye ||##84-6## apagatavirahavyathAstadA tA rahasi vidhAya dadAtha tattvabodham | paramasukhachidAtmako.ahamAtmetyudayatu vaH sphuTameva chetasIti ||##84-7## sukharasaparimishrito viyogaH kimapi purAbhavaduddhavopadeshaiH | samabhavadamutaH paraM tu tAsAM paramasukhaikyamayI bhavadvichintA ||##84-8## munivaranivahaistavAtha pitrA duritashamAya shubhAni pR^ichChyamAnaiH | tvayi sati kimidaM shubhAntarairityuruhasitairapi yAjitastadAsau ||##84-9## sumahati yajane vitAyamAne pramuditamitrajane sahaiva gopAH | yadujanamahitAstrimAsamAtraM bhavadanuSha~NgarasaM pureva bhejuH ||##84-10## vyapagamasamaye sametya rAdhAM dR^iDhamupagUhya nirIkShya vItakhedAm | pramuditahR^idayaH puraM prayAtaH pavanapureshvara pAhi mAM gadebhyaH ||##84-11## ##85 The slaying of Jarasandha ## tato magadhabhUmR^itA chiranirodhasaMkleshitaM shatAShTakayutAyutadvitayamIsha bhUmIbhR^itAm | anAthasharaNAya te kamapi pUruShaM prAhiNo\- dayAchata sa mAgadhakShapaNameva kiM bhUyasA ||##85-1## yiyAsurabhimAgadhaM tadanu nAradodIritA- dyudhiShThiramakhodyamAdubhayakAryaparyAkulaH | viruddhajayino.adhvarAdubhayasiddhirityuddhave shashaMsuShi nijaiH samaM puramiyetha yaudhiShThirIm ||##85-2## asheShadayitAyute tvayi samAgate dharmajo vijitya sahajairmahIM bhavadapA~NgasaMvardhitaiH | shriyaM nirupamAM vahannahaha bhaktadAsAyitaM bhavantamayi mAgadhe prahitavAnsabhImArjunam ||##85-3## girivrajapuraM gatAstadanu deva yUyaM trayo yayAcha samarotsavaM dvijamiSheNa taM mAgadham | apUrNasukR^itaM tvamuM pavanajena saMgrAmayan nirIkShya saha jiShNunA tvamapi rAjayudhvA sthitaH ||##85-4## ashAntasamaroddhataM viTapapATanAsaMj~nayA nipAtya jarasassutaM pavanajena niShpATitam | vimuchya nR^ipatInmudA samanugR^ihya bhaktiM parAM dideshitha gataspR^ihAnapi cha dharmaguptyai bhuvaH ||##85-5## prachakruShi yudhiShThire tadanu rAjasUyAdhvaraM prasannabhR^itakIbhavatsakalarAjakavyAkulam | tvamapyayi jagatpate dvijapadAvanejAdikaM chakartha kimu kathyate nR^ipavarasya bhAgyonnatiH ||##85-6## tatassavanakarmaNi pravaramagryapUjAvidhiM vichArya sahadevavAganugatassa dharmAtmajaH | vyadhatta bhavate mudA sadasi vishvabhUtAtmane tadA sasuramAnuShaM bhuvanameva tR^iptiH dadhau ||##85-7## tatassapadi chedipo muninR^ipeShu tiShThatsvaho sabhAjayati ko jaDaH pashupadurdurUTaM vaTum | iti tvayi sa durvachovitatimudvamannAsanA\- dudApatadudAyudhaH samapatannamuM pANDavAH ||##85-8## nivArya nijapakShagAnabhimukhasya vidveShiNa- stvameva jahR^iShe shiro danujadAriNA svAriNA | janustritayalabdhayA satatachintayA shuddhadhI- stvayA sa paramekatAmadhR^ita yoginAM durlabhAm ||##85-9## tatassumahito tvayA kratuvare nirUDhe jano yayau jayati dharmajo jayati kR^iShNa ityAlapan | khalaH sa tu suyodhano dhutamanAssapatnashriyA mayArpitasabhAmukhe sthalajalabhramAdabhramIt ||##85-10## tadA hasitamutthitaM drupadandanAbhImayo\- rapA~NgakalayA vibho kimapi tAvadujjR^imbhayan | dharAbharanirAkR^itau sapadi nAma bIjaM vapan janArdana marutpurInilaya pAhi mAmAmayAt ||##85-11## ##86 Slaying of Salva ## sAlvo bhaiShmIvivAhe yadubalavijitashchandrachUDAdvimAnaM vindansaubhaM sa mAyI tvayi vasati kurUMstvatpurImabhyabhA~NkShIt | pradyumnastaM nirundhannakhilayadubhaTairnyagrahIdugravIryaM tasyAmAtyaM dyumantaM vyajani cha samarassaptaviMshatyahAntaH ||##86-1## tAvattvaM rAmashAlI tvaritamupagataH khaNDitaprAyasainyaM saubheshaM taM nyarundhAH sa cha kila gadayA shAr~NgamabhraMshayatte | mAyAtAtaM vyahiMsIdapi tava puratastattvayApi kShaNArdhaM nAj~nAyItyAhureke tadidamavamataM vyAsa eva nyaShedhIt ||##86-2## kShiptvA saubhaM gadAchUrNitamudakanidhau ma~NkShu sAlve.api chakre\- NotkR^itte dantavaktraH prasabhamabhipatannabhyamu~nchadgadAM te | kaumodakyA hato.asAvapi sukR^itanidhishchaidyavatprApadaikyaM sarveShAmeSha pUrvaM tvayi dhR^itamanasAM mokShaNArtho.avatAraH ||##86-3## tvayyAyAte.atha jAte kila kurusadasi dyUtake saMyatAyAH krandantyA yAj~nasenyAH sakaruNamakR^ithAshchelamAlAmanantAm | annAntaprAptasharvAMshajamunichakitadraupadI chintito.atha prAptash shAkAnnamashnan munigaNamakR^ithAstR^iptimantaM vanAnte ||##86-4## yuddhodyoge.atha mantre milati sati vR^itaH phalgunena tvamekaH kauravye dattasainyaH karipuramagamo dUtyakR^itpANDavArtham | bhIShmadroNAdimAnye tava khalu vachane dhikkR^ite kauraveNa vyAvR^iNvanvishvarUpaM munisadasi purIM kShobhayitvAgato.abhUH ||##86-5## jiShNostvaM kR^iShNa sUtaH khalu samaramukhe bandhughAte dayAluM khinnaM taM vIkShya vIraM kimidamayi sakhe nitya eko.ayamAtmA | ko vadhyaH ko.atra hantA tadiha vadhabhiyaM projjhya mayyarpitAtmA dharmyaM yuddhaM chareti prakR^itimanayathA darshayanvishvarUpam ||##86-6## bhaktottaMse.atha bhIShme tava dharaNibharakShepakR^ityaikasakte nityaM nityaM vibhindatyayutasamadhikaM prAptasAde cha pArthe | nishshastratvapratij~nAM vijahadarivaraM dhArayankrodhashAlI\- vAdhAvanprA~njaliM taM natashirasamatho vIkShya modAdapAgAH ||##86-7## yuddhe droNasya hastisthiraraNabhagadatteritaM vaiShNavAstraM vakShasyAdhatta chakrasthagitaravimahAH prArdayansindhurAjam | nAgAstre karNamukte kShitimavanamayankevalaM kR^ittamauliM tatre tatrApi pArthaM kimiva na hi bhavAn pANDavAnAmakArShIt ||##86-8## yuddhAdau tIrthagAmI sa khalu haladharo naimishakShetramR^ichCha\- nnapratyutthAyisUtakShayakR^idatha sutaM tatpade kalpayitvA | yaj~naghnaM balvalaM parvaNi paridalayan snAtatIrtho raNAnte samprApto bhImaduryodhanaraNamashamaM vIkShya yAtaH purInte ||##86-9## saMsuptadraupadeyakShapaNahatadhiyaM drauNimetya tvaduktyA tanmuktaM brAhmamastraM samahR^ita vijayo mauliratnaM cha jahre | uchChittyai pANDavAnAM punarapi cha vishatyuttarAgarbhamastre rakShanna~NguShThamAtraH kila jaTharamagAshchakrapANirvibho tvam ||##86-10## dharmaughaM dharmasUnorabhidadhadakhilaM ChandamR^ityuH sa bhIShma- stvAM pashyanbhaktibhUmnaiva hi sapadi yayau niShkalabrahmabhUyam | saMyAjyAthAshvamedhaistribhiratimahitairdharmajaM pUrNakAmaM samprApto dvArakAM tvaM pavanapurapate pAhi mAM sarvarogAt ||##86-11## ##87 The Kuchela episode ## kuchelanAmA bhavataH satIrthyatAM gataH sa sAndIpanimandire dvijaH | tvadekarAgeNa dhanAdiniHspR^iho dinAni ninye prashamI gR^ihAshramI ||##87-1## samAnashIlA.api tadIyavallabhA tathaiva no chittajayaM sameyuShI | kadAchidUche bata vR^ittilabdhaye ramApatiH kiM na sakhA niShevyate ||##87-2## itIrito.ayaM priyayA kShudhArtayA jugupsamAno.api dhane madAvahe | tadA tvadAlokanakautukAdyayau vahanpaTAnte pR^ithukAnupAyanam ||##87-3## gato.ayamAshcharyamayIM bhavatpUrIM gR^iheShu shaibyAbhavanaM sameyivAn | pravishya vaikuNThamivApa nirvR^itiM tavAtisambhAvanayA tu kiM punaH ||##87-4## prapUjitaM taM priyayA cha vIjitaM kare gR^ihItvA.akathayaH purA kR^itam | yadindhanArthaM gurudArachoditairapartuvarShaM tadamarShi kAnane ||##87-5## trapAjuSho.asmAtpR^ithukaM balAdatha pragR^ihya muShTau sakR^idAshite tvayA | kR^itaM kR^itaM nanviyateti sambhramAdramA kilopetya karaM rurodha te ||##87-6## bhakteShu bhaktena sa mAnitastvayA purIM vasannekanishAM mahAsukham | batAparedyurdraviNaM vinA yayau vichitrarUpastava khalvanugrahaH ||##87-7## yadi hyayachiShyamadAsyadachyuto vadAmi bhAryAM kimiti vrajannasau | tvaduktilIlAsmitamagnadhIH punaH kramAdapashyanmaNidIpramAlayam ||##87-8## kiM mArgavibhraMsha iti bhramankShaNaM gR^ihaM praviShTaH sa dadarsha vallabhAm | sakhIparItAM maNihemabhUShitAM bubodha cha tvatkaruNAM mahAdbhutAm ||##87-9## sa ratnashAlAsu vasannapi svayaM samunnamadbhaktibharo.amR^itaM yayau | tvamevamApUritabhaktavA~nChito marutpurAdhIsha harasva me gadAn ||##87-10## ##88 The episode of Santana Gopalam ## prAgevAchAryaputrAhR^itinishamanayA svIyaShaTsUnuvIkShAM kAMkShantyA mAturuktyA sutalabhuvi baliM prApya tenArchitastvam | dhAtushshApAddhiraNyAnvitakashipubhavAnshaurijAn kaMsabhagnA\- nAnIyainAn pradarshya svapadamanayathAH pUrvaputrAnmarIcheH ||##88-1## shrutadeva iti shrutaM dvijendraM bahulAshvaM nR^ipatiM cha bhaktipUrNam | yugapattvamanugrahItukAmo mithilAM prApitha tApasaiH sametaH ||##88-2## gachChandvimUrtirubhayoryugapanniketamekena bhUrivibhavairvihitopachAraH | anyena taddinabhR^itaishcha phalaudanAdyaistulyaM praseditha dadAtha cha muktimAbhyAm ||##88-3## bhUyo.atha dvAravatyAM dvijatanayamR^itiM tatpralApAnapi tvaM ko vA daivaM nirundhyAditi kila kathayanvishvavoDhA.apyasoDhAH | jiShNorgarvaM vinetuM tvayi manujadhiyA kuNThitAM chAsya buddhiM tattvArUDhAM vidhAtuM paramatamapadaprekShaNeneti manye ||##88-4## naShTA aShTAsya putrAH punarapi tava tUpekShayA kaShTavAdaH spaShTo jAto janAnAmatha tadavasare dvArakAmApa pArthaH | maitryA tatroShito.asau navamasutamR^itau vipravaryaprarodaM shrutvA chakre pratij~nAmanupahR^itasutassannivekShye kR^ishAnum ||##88-5## mAnI sa tvAmapR^iShTvA dvijanilayagato bANajAlairmahAstrai rundhAnaH sUtigehaM punarapi sahasA dR^iShTanaShTe kumAre | yAmyAmaindrIM tathAyAssuravaranagarIrvidyayA.asAdya sadyo moghodyogaH patiShyanhutabhuji bhavatA sasmitaM vArito.abhUt ||##88-6## sArdhaM tena pratIchIM dishamatijavinA syandanenAbhiyAto lokAlokaM vyatItastimirabharamatho chakradhAmnA nirundhan | chakrAMshukliShTadR^iShTiM sthitamatha vijayaM pashya pashyeti vArAM pAre tvaM prAdadashaH kimapi hi tamasAM dUradUraM padaM te ||##88-7## tatrAsInaM bhuja~NgAdhipashayanatale divyabhUShAyudhAdyai\- rAvItaM pItachelaM pratinavajaladashyAmaLaM shrImada~Ngam | mUrtInAmIshitAraM paramiha tisR^iNAmekamarthaM shrutInAM tvAmeva tvaM parAtman priyasakhasahito nemitha kShemarUpam ||##88-8## yuvAM mAmevadvAvadhikavivR^itAntarhitatayA vibhinnau sundraShTuM svayamahamahArShaM dvijasutAn | nayetaM drAgenAniti khalu vitIrNAnpunaramUn dvijAyAdAyAdAH praNutamahimA pANDujanuShA ||##88-9## evaM nAnAvihArairjagadabhiramayanvR^iShNivaMshaM prapuShNa\- nnIjAno yaj~nabhedairatulavihR^itibhiH prINayanneNanetrAH | bhUbhArakShepadambhAt padakamalajuShAM mokShaNAyAvatIrNaH pUrNaM brahmaiva sAkShAdyaduShu manujatArUShitastvaM vyalAsIH ||##88-10## prAyeNa dvAravatyAmavR^itadayi tadI nAradastvadrasArdra- stasmAllebhe kadAchitkhalu sukR^itanidhistvatpitA tattvabodham | bhaktAnAmagrayAyI sa cha khalu matimAnuddhavastvatta eva prApto vij~nAnasAraM sa kila janahitAyAdhunA.aste vadaryAm ||##88-11## so.ayaM kR^iShNAvatAro jayati tava vibho yatra sauhArdabhIti\- snehadveShAnurAgaprabhR^itibhiratulairashramairyogabhedaiH | ArtiM tIrvA samastAmamR^itapadamagussarvataH sarvalokAH sa tvaM vishvArtishAntyai pavanapurapate bhaktipUrtyai cha bhUyAH ||##88-12## ##89 The slaying of Vrikasura ## ramAjAne jAne yadiha tava bhakteShu vibhavo na sampadyaH sadyastadiha madakR^ittvAdashaminAm | prashAntiM kR^itvaiva pradishasi tataH kAmamakhilaM prashAnteShu kShipraM na khalu bhavadIye chyutikathA ||##89-1## sadyaHprasAdaruShitAnvidhisha~NkarAdIn kachidvibho nijaguNAnuguNaM bhajantaH | bhraShTA bhavanti bata kaShTamadIrghadR^iShTyA spaShTaM vR^ikAsara udAharaNaM kilAsmin ||##89-2## shakunijaH sa hi nAradamekadA tvaritatoShamapR^ichChadadhIshvaram | sa cha didesha girIshamupAsituM na tu bhavantamabandhumasAdhuShu ||##89-3## tapastaptv ghoraM sa khalu kupitaH saptamadine shirashChittvA sadyaH puraharamupasthApya purataH | atikShudraM raudraM shirasi karadAnena nidhanaM jagannAthAdvavre bhavati vimukhAnAM kva shubhadhIH ||##89-4## moktAraM bandhamukto hariNapatiriva prAdravatso.atha rudraM daityAdbhItyA sma devo dishi dishi valate pR^iShThato dattadR^iShTiH | tUShNIke sarvaloke tava padamadhirokShyantamudvIkShya sharvaM dUrAdevAgratastvaM paTuvaTuvapuShA tasthiShe dAnavAya ||##89-5## bhadraM te shAkuneya bhramasi kimadhunA tvaM pishAchasya vAchA sandehashchenmaduktau tava kimu na karoShya~NgulIma~Nga maulau | itthaM tvadvAkyamUDhaH shirasi kR^itakaraH so.apatachChinnapAtaM bhraMsho hyevaM paropAsiturapi cha gatiH shUlino.api tvameva ||##89-6## bhR^iguM kila sarasvatInikaTavAsinastApasA\- strimurtiShu samAdishannadhikasattvatAM veditum | ayaM punaranAdarAduditaruddharoShe vidhau hare.api cha jihiMsiShau girijayA dhR^ite tvAmagAt ||##89-7## suptaM ramA~Nkabhuvi pa~NkajalochanaM tvAM vipre vinighnati padena mudotthitastvam | sarvaM kShamasva munivarya bhavetsadA me tvatpAdachihnamiha bhUShaNamityavAdIH ||##89-8## nishchitya te cha sudR^iDhaM tvayi baddhabhAvAH sArasvatA munivarA dadhire vimokSham | tvAmevamachyuta punashchyutidoShahInaM sattvochchayaikatanumeva vayaM bhajAmaH ||##89-9## jagatsR^iShTyAdau tvAM nigamanivahairvandibhiriva stutaM viShNo sachchitparamarasanirdvaitavapuSham | parAtmAnaM bhUman pashupavinatAbhAgyanivahaM parItapashrAntyai pavanapuravAsin paribhaje ||##89-10## ##90 The aim of all scriptures ## vR^ikabhR^igusunimohinyambarIShAdivR^itte\- Shvayi tava hi mahattvaM sarvasharvAdijaitram | sthitamiha paramAtman niShkalArvAgabhinnaM kimapi yadavabhAtaM taddhi rUpaM tavaiva ||##90-1## mUrtitrayeshvarasadAshivapa~nchakaM yat prAhuH parAtmavapureva sadAshivo.asmin | tatreshvarastu sa vikuNThapadastvameva tritvaM punarbhajasi satyapade tribhAge ||##90-2## tatrApi sAttvikatanuM tava viShNumAhu- rdhAtA tu sattvaviraLo rajasaiva pUrNaH | satvotkaTatvamapi chAsti tamovikAra\- cheShTAdikaM cha tava sha~NkaranAmni mUrtau ||##90-3## taM cha trimUrtyatigataM purapUruShaM tvAM sharvAtmanApi khalu sarvamayatvahetoH | shaMsantyupAsanaavidhau tadapi svatastu tvadrUpamityatidR^iDhaM bahu naH pramANam ||##90-4## shrIsha~Nkaro.api bhagavAnsakaleShu tAvat tvAmeva mAnayati yo na hi pakShapAtI | tvanniShThameva sa hi nAmasahasrakAdi vyAkhyadbhavatstutiparashcha gatiM gato.ante ||##90-5## mUrtitrayAtigamuvAcha cha mantrashAstra- syAdau kalAyasuShamaM sakaleshvaraM tvAm | dhyAnaM cha niShkaLamasau praNave khalUktvA tvAmeva tatra sakalaM nijagAda nAnyam ||##90-6## samastasAre cha purANasaMgrahe visaMshayaM tvanmahimaiva varNyate | trimUrtiyuksatyapadatribhAgataH paraM padaM te kathitaM na shUlinaH ||##90-7## yadbrAhmakalpa iha bhAgavatadvitIya\- skandhoditaM vapuranAvR^itamIsha dhAtre | tasyaiva nAma harisharvamukhaM jagAda shrImAdhavaH shivaparo.api purANasAre ||##90-8## ye svaprakR^ityanuguNA girishaM bhajante teShAM phalaM hi dR^iDhayaiva tadIyabhaktyA | vyAso hi tena kR^itavAnadhikArihetoH skAndAdikeShu tava hAnivacho.arthavAdaiH ||##90-9## bhUtArthakIrtiranuvAdaviruddhavAdau tredhArthavAdagatayaH khalu rochanArthAH | skAndAdikeShu bahavo.atra viruddhavAdA- stvattAmasatvaparibhUtyupashikShaNAdyAH ||##90-10## yatki~nchidapyaviduShApi vibho mayoktaM tanmantrashAstravachanAdyabhidR^iShTameva | vyAsoktisAramayabhAgavatopagIta kleshAnvidhUya kuru bhaktibharaM parAtman ||##90-11##