##NARAYANEEYAM (Dasakas 91-100)##
##91 	The path of devotion##
shrIkR^iShNa tvatpadopAsanamabhayatamaM baddhamithyArthadR^iShTe-
rmartyasyArtasya manye vyapasarati bhayaM yena sarvAtmanaiva |
yattAvattvatpraNItAniha bhajanavidhInAsthito mohamArge
dhAvannapyAvR^itAkShaH skhalati na kuhachiddevadevAkhilAtman ||##91-1##
bhUman kAyena vAchA muhurapi manasA tvadbalapreritAtmA
yadyatkurve samastaM tadiha paratare tvayyasAvarpayAmi |
jAtyApIha shvapAkastvayi nihitamanaH karmavAgindriyArtha\-
prANo vishvaM punIte na tu vimukhamanAstvatpadAdvipravaryaH ||##91-2##
bhItirnAma dvitIyAdbhavati nanu manaHkalpitaM cha dvitIyaM
tenaikyAbhyAsashIlo hR^idayamiha yathAshakti buddhyA nirundhyAm |
mAyAviddhe tu tasminpunarapi na tathA bhAti mAyAdhinAthaM
taM tvAM bhaktyA mahatyA satatamanubhajannIsha bhItiM vijahyAm ||##91-3##
bhakterutpattivR^iddhI tava charaNajuShaM sa~Ngamenaiva puMsA\-
mAsAdye puNyabhAjAM shriya iva jagati shrImatAM sa~Ngamena |
tatsa~Ngo deva bhUyAnmama khalu satataM tanmukhAdunmiShadbhi-
stvanmAhAtmyaprakArairbhavati cha sudR^iDhA bhaktiruddhUtapApA ||##91-4##
shreyomArgeShu bhaktAvadhikabahumatirjanmakarmANi bhUyo
gAyankShemANi nAmAnyapi tadubhayataH pradrutaM pradrutAtmA |
udyaddhAsaH kadachitkuhAchidapi rudankvApi garjanpragAya\-
nnunmAdIva pranR^ityannayi kuru karuNAM lokabAhyashchareyam ||##91-5##
bhUtAnyetAni bhUtAtmakamapi sakalaM pakShimatsyAnmR^igAdIn
martyAnmitrANi shatrUnapi yamitamatistvanmayAnyAnamAni |
tvatsevAyAM hi sidhyenmama tava kR^ipayA bhaktidArDhyaM virAga-
stvattattvasyAvabodho.api cha bhuvanapate yatnabhedaM vinaiva ||##91-6##
no muhyankShuttR^iDAdyairbhavasaraNibhavaistvannilInAshayatvA\-
chchintAsAtatyashAlI nimiShalavamapi tvatpadAdaprakampaH |
iShTAniShTeShu tuShTivyasanavirahito mAyikatvAvabodhA\-
jjyotsnAbhistvannakhendoradhikashishiritenAtmanA sa~nchareyam ||##91-7##
bhUteShveShu tvadaikyasmR^itisamadhigatau nAdhikAro.adhunA chet
tvatprema tvatkamaitrI jaDamatiShu kR^ipA dviTsu bhUyAdupekShA |
archAyAM vA samarchAkutukamurutarashraddhayA vardhatAM me
tvatsaMsevI tathApi drutamupalabhate bhaktalokottamatvam ||##91-8##
AvR^itya tvatsvarUpaM kShitijalamarudAdyAtmanA vikShipantI
jIvAnbhUyiShThakarmAvalivivashagatIn duHkhajAle kShipantI |
tvanmAyA mAbhibhUnmAmayi bhuvanapate kalpate tatprashAntyai
tvatpAde bhaktirevetyavadadayi vibho siddhayogI prabuddhaH ||##91-9##
duHkhAnyAlokya jantuShvalamuditaviveko.ahamAchAryavaryA\-
llabdhvA tvadrUpatattvaM guNacharitakathAdyudbhavatbhaktibhUmA |
mAyAmenAM taritvA paramasukhamaye tvatpade moditAhe
tasyAyaM pUrvara~NgaH pavanapurapate nAshayAsheSharogAn ||##91-10##
##92 	Bhakti combined with karma##
vaidaissarvANi karmANyaphalaparatayA varNitAnIti budhvA
tAni tvayyarpitAnyeva hi samanucharan yAni naiShkarmyamIsha |
mA bhUdvedairniShiddhe kuhachidapi manaHkarmavAchAH pravR^itti-
rdurvarjja~nchedavAptaM tadapi khalu bhavatyarpaye chitprakAshe ||##92-1##
yastvanyaH karmayogastava bhajanamayastatra chAbhIShTamUrtiM
hR^idyAM sattvaikarUpAM dR^iShadi hR^idi mR^idi kvApi vA bhAvayitvA |
puShpairgandhairnivedyairapi cha virachitaiH shaktito bhaktipUtai-
rnityaM varyAM saparyAM vidadhadayi vibho tvatprasAdaM bhajeyam ||##92-2##
strIshUdrAstvatkathAdishravaNavirahitA AsatAM te dayArhA-
stvatpAdAsannayAtAndvijakulajanuSho hanta shochAmyashAntAn |
vR^ittyarthaM te yajanto bahukathitamapi tvAmanAkarNayanto
dR^iptA vidyAbhijAtyaiH kimu na vidadhate tAdR^ishaH mA kR^ithA mAm ||##92-3##
papo.ayaM kR^iShNa rAmetyabhilapati nijaM gUhituM dushchAritraM
nirlajjasyAsya vAchA bahutarakathanIyAni me vighnitAni |
bhrAtA me vandhyashIlo bhajati kila sadA viShNumitthaM budhAMste
nindantyuchchairhasanti tvayi nihitaratIMstAdR^ishaM mA kR^ithA mAm ||##92-4##
shvetachChAyaM kR^ite tvAM munivaravapuShaM prINayante tapobhi\-
stretAyAM sruksruvAdya~NkitamaruNatanuM yaj~narUpaM yajante |
sevante tantramArgairvilasadarigadaM dvApare shyAmalA~NgaM
nIlaM sa~NkIrtanAdyairiha kalisamaye mAnuShAstvAM bhajante ||##92-5##
so.ayaM kAleyakAlo jayati muraripo yatra sa~NkIrtanAdyai-
rniryatnaireva mArgairakhilada nachirAttvatprasAdaM bhajante |
jAtAstretAkR^itAdAvapi hi kila kalau sambhavaM kAmayante
daivAttatraiva jAtAnviShayaviSharasairmA vibho va~nchayAsmAn ||##92-6##
bhaktAstAvatkalau syurdramiLabhuvi tato bhUrishastatra chochchaiH
kAverIM tAmraparNImanukila dhR^itamAlA~ncha puNyAM pratIchIm |
hA mAmapyetadantarbhavamapi cha vibho ki~nchida~nchidrasaM tva\-
yyAshApAshairnibadhya bhramaya na bhagavan pUraya tvanniShevAm ||##92-7##
dR^iShTvA dharmadruhaM taM kalimapakaruNaM prA~NmahIkShitparIkShi\-
ddhantuM vyAkR^iShTakhaDgo.api na vinihatavAn sAravedI guNAMshAt |
tvatsevAdyAshu sidhyedasadiha na tathA tvatpare chaiSha bhIru-
ryattu prAgeva rogAdibhirapaharate tatra hA shikShayainam ||##92-8##
ga~NgA gItA cha gAyatryapi cha tuLasikA gopikAchandanaM tat
sALagrAmAbhipUjA parapuruSha tathaikAdashI nAmavarNAH |
etAnyaShTApyayatnAnyayi kalisamaye tvatprasAdapravR^iddhyA
kShipraM muktipradAnItyabhidadhurR^iShayasteShu mAM sajjayethAH ||##92-9##
devarShINAM pitR^INAmapi na punarR^iNI ki~Ngaro vA sa bhUman
yo.asau sarvAtmanA tvAM sharaNamupagataH sarvakR^ityAni hitvA |
tasyotpannaM vikarmApyakhilamapanudasyeva chittasthitastvaM
tanme paapotthatApAnpavanapurapate rundi bhaktiM praNIyAH ||##92-10##
##93 	The lessons from 25 gurus##
bandhusnehaM vijahyAM tava hi karuNayA tvayyupAveshitAtmA
sarvaM tvaktvA chareyaM sakalamapi jagadvIkShya mAyAvilAsam |
nAnAtvAd{}bhrAntijanyAtsati khalu guNadoShAvabodhe vidhirvA
vyAsedho vA kathaM tau tvayi nihitamatervItavaiShamyabuddheH ||##93-1##
kShuttR^iShNAlopamAtre satatakR^itadhiyo jantavassantyanantA\-
stebhyo vij~nAnavattvAtpuruSha iha varastajjanirdurlabhaiva |
tatrApyAtmAtmanaH syAtsuhR^idapi cha ripuryastvayi nyastachetA\-
stApochChitterupAyaM smarati sa hi suhR^itsvAtmavairI tato.anyaH ||##93-2##
tvatkAruNye pravR^itte ka iva na hi gururlokavR^itte.api bhUman
sarvAkrAntApi bhUmirna hi chalati tataH satkShamAM shikShayeyam |
gR^ihNIyAmIsha tattadviShayaparichate.apyaprasaktiM samIrA-
dvyAptatva~nchAtmano me gaganaguruvashAdbhAtu nirlepatA cha ||##93-3##
svachChaH syAM pAvano.ahaM madhura udakavadvahnivanmA sma gR^ihNAM
sarvAnnIno.api doShaM taruShu tamiva mAM sarvabhUteShvaveyAm |
puShTirnaShTiH kalAnAMM shashina iva tanornAtmano.astIti vidyAM
toyAdivyastamArtANDavadapi cha tanuShvekatAM tvatprasAdAt ||##93-4##
snehAdvyAdhAstaputrapraNayamR^itakapotAyito mA sma bhUvaM
prApta prAshnansaheya kShudhamapi shayuvatsindhuvatsyAmagAdhaH |
mA paptaM yoShidAdau shikhini shalabhavadbhR^i~NgavatsArabhAgI
bhUyAsaM kintu tadvaddhanachayanavashAnmAhamIsha praNesham ||##93-5##
mA badhyAsaM taruNyA gaja iva vashayA nArjayeyaM dhanaughaM
hartAnyastaM hi mAdhvIhara iva mR^igavanmA guhaM grAmyagItaiH |
nAtyAsajjeya bhojye jhaSha iva biLishe pi~NgalAvannirAshaH
supyAM bhartavyayogAtkurara iva vibho sAmiSho.anyairna hanyai ||##93-6##
varteya tyaktamAnaH sukhamatishishuvannissahAyashchareyaM
kanyAyA ekasheSho valaya iva vibho varjitAnyonyaghoShaH |
tvachchitto nAvabudhyai paramiShukR^idiva kShmAbhR^idAyAnaghoShaM
geheShvanyapraNIteShvahiriva nivasAnyundurormandireShu ||##93-7##
tvayyeva tvatkR^itaM tvaM kShapayasi jagadityUrNanAbhAtpratIyAM
tvachchintA tvatsvarUpaM kuruta iti dR^iDhaM shikSheye peshakArAt |
viDbhasmAtmA cha dehi bhavati guruvaro yo vivekaM viraktiM
dhatte sa~nchintyamAno mama tu bahurujApIDito.ayaM visheShAt ||##93-8##
hI hI me dehamohaM tyaja pavanapurAdhIsha yatpremaheto-
rgehe chitte kaLatrAdiShu cha vivashitAstvatpadaM vismaranti |
so.ayaM vahneH shuno vA paramiha parataH sAmprata~nchAkShikarNa\-
tvagjihvAdyA vikarShantyavashamata itaH ko.api na tvatpadAbje ||##93-9##
durvAro dehamoho yadi punaradhunA tarhi nishsheSharogAn
hR^itvA bhaktiM draDhiShThAM kuru tava padapa~Nkeruhe pa~NkajAkSha |
nUnaH nAnAbhavAnte samadhigatamimaM muktidaM vipradehaM
kShudre hA hanta mA mA kShipa viShayarase pAhi mAM mArutesha ||##93-10##
##94 	The means of enlightenment##
shuddhA niShkAmadharmaiH pravaragurugirA tatsvarUpaM paraM te
shuddhaM dehendriyAdivyapagatamakhilavyAptamAvedayante|
nAnAtvasthaulyakArshyAdi tu guNajavapussa~Ngato.adhyAsitaM te
vahnerdAruprabhedeShviva mahadaNutAdIptatAshAntatAdi ||##94-1##
AchAryAkhyAdharasthAraNisamanumiLachChiShyarUpottarAra\-
NyAvedhodbhAsitena sphuTataraparibodhAgninA dahyamAne |
karmAlIvAsanAtatkR^itatanubhuvanabhrAntikAntArapUre
dAhyAbhAvena vidyAshikhini cha virate tvanmayI khalvavasthA ||##94-2##
evaM tvatprAptito.anyo nahi khalu nikhilakleshahAnerupAyo
naikAntAtyantikAste kR^iShivadagadaShADguNyaShaDkarmayogAH |
durvaikalyairakalyA api nigamapathAstatphalAnyapyavAptA
mattAstvAM vismarantaH prasajati patane yAntyanantAnviShAdAn ||##94-3##
tvallokAdanyalokaH kvanu bhayarahito yatparArdhadvayAnte
tvadbhItassatyaloke.api na sukhavasatiH padmabhUH padmanAbha |
evambhAve tvadharmArjitabahutamasAM kA kathA nArakANAM
tanme tvaM Chindhi bandhaM varada kR^ipaNabandho kR^ipApUrasindho ||##94-4##
yAthArthyAttvanmayasyaiva hi mama na vibho vastuto bandhamokShau
mAyAvidyAtanubhyAM tava tu virachitau svapnabodhopamau tau |
baddhe jIvadvimuktiM gatavati cha bhidA tAvatI tAvadeko
bhu~Nkte dehadrumastho viShayaphalarasAnnAparo nirvyathAtmA ||##94-5##
jIvanmuktatvamevaMvidhamiti vachasA kiM phalaM dUradUre
tannAmAshuddhabuddherna cha laghu manasaH shodhanaM bhaktito.anyat |
tanme viShNo kR^iShIShThAstvayi kR^itasakalaprArpaNaM bhaktibhAraM
yena syAM ma~NkShu ki~nchidguruvachanamiLattvatprabodhastvadAtmA ||##94-6##
shabdabrahmaNyapIha prayatitamanasastvAM na jAnanti kechit
kaShTaM vandhyashras sakalamalaaharA divyalIlAvatArAH
sachchitsAndraM cha rUpaM tava na nigaditaM tAM na vAchaM bhriyAsam ||##94-7##
yo yAvAnyAdR^isho vA tvamiti kimapi naivAvagachChAmi bhUma\-
nneva~nchAnanyabhAvastvadanubhajanamevAdriye chaidyavairin |
tvalli~NgAnAM tvada~N{}ghripriyajanasadasAM darshanasparshanAdi\-
rbhUyAnme tvatprapUjAnatinutiguNakarmAnukIrtyAdaro.api ||##94-8##
yadyallabhyeta tattattava samupahR^itaM deva dAso.asmi te.ahaM
tvadgehonmArjanAdyaM bhavatu mama muhuH karma nirmAyameva |
sUryAgnibrAhmaNAtmAdiShu lasitachaturbAhumArAdhaye tvAM
tvatpremArdratvarUpo mama satatamabhiShyandatAM bhaktiyogaH ||##94-9##
aikyaM te dAnohomavrataniyamatapassA~NkhyayogairdurApaM
tvatsa~Ngenaiva gopyaH kila sukR^ititamAH prApurAnandasAndram |
bhakteShvanyeShu bhUyassvapi bahumanuShe bhaktimeva tvamAsAM
tanme tvadbhaktimeva dR^iDhaya hara gadAnkR^iShNa vAtAlayesha ||##94-10##
##95 	The means of liberation##
Adau hairaNyagarbhIM tanumavikalajIvAtmikAmAsthitastvaM
jIvatvaM prApya mAyAguNagaNakhachito vartase vishvayone |
tatrodvR^iddhena sattvena tu gaNayugaLaM bhaktibhAvaM gatena\-
ChitvA sattvaM cha hitvA punaranupahito vartitAhe tvameva ||##95-1##
sattvonmeShAtkadAchitkhalu viShayarase doShabodhe.api bhUman
bhUyo.apyeShu pravR^ittiH satamasi rajasi proddhate durnivArA |
chittaM tAvadguNAshcha grathitamiha mithastAni sarvANi roddhuM
turye tvayyekabhaktiH sharaNamiti bhavAnhaMsarUpI nyagAdIt ||##95-2##
santi shreyAMsi bhUyAMsyapi ruchibhidayA karmiNAM nirmitAni
kShudrAnandAshcha sAntA bahuvidhagatayaH kR^iShNa tebhyo bhaveyuH |
tva~nchAchakhyAtha sakhye nanu mahitatamAM shreyasAM bhaktimekAM
tvadbhaktyAnandatulyaH khalu viShayajuShAM sammadaH kena vA syAt ||##95-3##
tvadbhaktyA tuShTabuddheH sukhamiha charato vichyutAshasya chAshAH
sarvAssyuH saukhyamayyaH salilakuharagasyeva toyaikamayyaH |
so.ayaM khalvindralokaM kamalajabhavanaM yogasiddhIshcha hR^idyA
nAkA~NkShatyetadAstAM svayamanupatite mokShasaukhye.apyanIhaH ||##95-4##
tvadbhakto bAdhyamAno.api cha viShayarasairindriyAshAntiheto\-
rbhaktyaivAkramyamANaiH punarapi khalu tairdurbalairnAbhijayyaH |
saptArchirdIpitArchirdahati kila yathA bhUridAruprapa~nchaM
tvadbhaktyoghe tathaiva pradahati duritaM durmadaH kvendriyANAm ||##95-5##
chittArdrIbhAvavamuchchairvapuShi cha pulakaM harShabAShpa~ncha hitvA
chittaM shuddhyetkathaM vA kimu bahutapasA vidyayA vItabhakteH |
tvadgAthAsvAdasiddhA~njanasatatamarImR^ijyamAno.ayamAtmA
chakShurvattattvasUkShmaM bhajati na tu tathAbhyastayA tarkakoTyA ||##95-6##
dhyAnaM te shIlayeyaM samatanusukhabaddhAsano nAsikAgra\-
nyastAkShaH pUrakAdyairjitapavanapathashchittapadmantvavA~ncham |
UrdhvAgraM bhAvayitvA ravividhushikhinassaMvichintyopariShTAt
tatrasthaM bhAvaye tvAM sajalajaladharashyAmalaM komaLA~Ngam ||##95-7##
AnIlashlakShNakeshaM jvalitamakarasatkuNDalaM mandahAsa\-
syandArdraM kaustubhashrIparigatavanamAloruhArAbhirAmam |
shrIvatsA~NkaM subAhuM mR^idulasadudaraM kA~nchanachChAyachelaM
chArusnigdhorumambhoruhalalitapadaM bhAvayeyaM bhavantam ||##95-8##
sarvA~NgeShva~Ngara~NgatkutukamatimuhurdhArayannIsha chittaM
tatrApyekatra yu~nje vadanasarasije sundare mandahAse |
tatrAlInantu chetaH paramasukhachidadvaitarUpe vitanva\-
nnanyanno chintayeyaM muhuriti samupArUDhayogo bhaveyam ||##95-9##
itthaM tvaddhyAnayoge sati punaraNimAdyaShTasaMsiddhayastA
dUrashrutyAdayo.api hyahamahamikayA sampateyurmurAre |
tvatsamprAptau vilambAvahamakhilamidaM nAdriye kAmaye.ahaM
tvAmevAnandapUrNaM pavanapurapate pAhi mAM sarvatApAt ||##95-10##
##96 	The glories of the Lord##
tvaM hi brahmaiva sAkShAt paramurumahimannakSharANAmakAra\-
stAro mantreShu rAj~nAM manurasi muniShu tvaM bhR^igurnArado.api |
prahlAdo dAnavAnAM pashuShu cha surabhiH pakShiNAM vainateyo
nAgAnAmasyanantaH surasaridapi cha srotasAM vishvamUrte ||##96-1##
brahmaNyAnAM balistvaM kratuShu cha japayaj~no.aso vIreShu pArtho
bhaktAnAmuddhavastvaM balamasi balinAM dhAma tejasvinAM tvam |
nAstyantastvadvibhUtervikasadatishayaM vastu sarvaM tvameva
tvaM jIvastvaM pradhAnaM yadiha bhavadR^ite tanna ki~nchitprapa~nche ||##96-2##
dharmaM varNAshramANAM shrutipathavihitaM tvatparatvena bhaktyA
kurvanto.antarvirAge vikasati shanakaissantyajanto labhante |
sattAsphUrtipriyatvAtmakamakhilapadArtheShu bhinneShvabhinnaM
nirmUlaM vishvamUlaM paramamahamiti tvadvibodhaM vishuddham ||##96-3##
j~nAnaM karmApi bhaktistritayamiha bhavatprApakaM tatra tAva\-
nnirviNNAnAmasheShe viShaya iha bhavet j~nAnayoge.adhikAraH |
saktAnAM karmayogastvayi hi vinihito ye tu nAtyantasaktA
nApyatyantaM viraktAstvayi cha dhR^itarasA bhaktiyogo hyamIShAm ||##96-4##
j~nAnaM tvadbhaktatAM vA laghu sukR^itavashAnmartyaloke labhante
tasmAttatraiva janma spR^ihayati bhagavan nAkago nArako vA |
AviShTaM mAM tu daivAdbhavajalanidhipotAyite martyadehe
tvaM kR^itvA karNadhAraM gurumanuguNavAtAyitastArayethAH ||##96-5##
avyaktaM mArgayantaH shrutibhirapi nayaiH kevalaj~nAnalubdhAH
klishyante.atIva siddhiM bahutarajanuShAmanta evApnuvanti |
dUrasthaH karmayogo.api cha paramaphale nanvayaM bhaktiyoga\-
stvAmUlAdeva hR^idyastvaritamayi bhavatprApako vardhatAM me ||##96-6##
j~nAnAyaivAtiyatnaM munirapavadate brahmatattvaM tu shruNvan
gADhaM tvatpAdabhaktiM sharaNamayati yastasya muktiH karAgre |
tvaddhyAne.apIha tulyA punarasukaratA chittachA~nchalyaheto\-
rabhyAsAdAshu shakyaM vashayituM tvatkR^ipAchArutAbhyAm ||##96-7##
nirviNNaH karmamArge khalu viShamatame tvatkathAdau cha gADhaM
jAtashraddho.api kAmAnayi bhuvanapate naiva shaknomi hAtum |
tadbhUyo nishchayena tvayi nihitamanA doShabuddhyA bhajaMstAn
puShNIyAM bhaktimeva tvayi hR^idayagate ma~NkShu na~NkShyanti sa~NgAH ||##96-8##
kashchitkleshArjitArthakShayavimalamatirnudyamAno janaudhaiH
prAgevaM prAhi vipro na khalu mama janaH kAlakarmagrahA vA |
cheto me duHkhahetustadiha guNagaNaM bhAvayatsarvakArI\-
tyuktvA shAnto gatastvAM mama cha kuru vibho tAdR^ishIM chittashAntim ||##96-9##
aiLaH prAgurvashIM pratyativivashamanAH sevamAnashchiraM tAM
gADhaM nirvidya bhUyo yuvatisukhamidaM kShudrameveti gAyan |
tvadbhaktiM prApya pUrNaH sukhataramacharattadvaduddhUta sa~NgaM
bhaktottaMsaM kriyA mAM pavanapurapate hanta me rundhirogAn ||##96-10##
##97 	Prayer for supreme devotion##
traiguNyAdbhinnarUpaM bhavati hi bhuvane hInamadhyottamaM yat\-
j~nAnaM shraddhA cha kartA vasatirapi sukhaM karma chAhArabhedAH |
tvatkShetratvanniShevAdi tu yadiha punastvatparaM tattu sarvaM
prAhurnairguNyaniShThaM tadanubhajanato ma~NkShu siddho bhaveyam ||##97-1##
tvayyeva nyastachittaH sukhamayi vicharansarvacheShTAstvadarthaM
tvadbhaktaissevyamAnAnapi charitacharAnAshrayan puMNyadeshAn |
dasyau vipre mR^igAdiShvapi cha samamatirmuchyamAnAvamAna\-
spardhAsUyAdidoShaH satatamakhilabhUteShu saMpUjaye tvAm ||##97-2##
tvadbhAvo yAvadeShu sphurati na vishadaM tAvadevaM hyupAstiM
kurvannaikAtmyabodhe jhaTiti vikasati tvanmayo.ahaM chareyam |
tvaddharmasyAsya tAvatkimapi na bhagavan prastutasya praNAsha\-
stasmAtsarvAtmanaiva pradisha mama vibho bhaktimArgaM manojham ||##97-3##
ta~nchainaM bhaktiyogaM draDhayitumayi me sAdhyamArogyamAyu\-
rdiShTyA tatrApi sevyaM tava charaNamaho bheShajAyeva dugdham |
mArkaNDeyo hi pUrvaM gaNakanigaditadvAdashAbdAyuruchchaiH
sevitvA vatsaraM tvAM tava bhaTanivahairdrAvayAmAsa mR^ityum ||##97-4##
##The episode of Markandeya##
mArkaNDeyashchirAyussa khalu punarapi tvatparaH puShpabhadrA\-
tIre ninye tapasyannatulasukharatiH ShaT tu manvantarANi |
devendrassaptamastaM surayuvatimarunmanmathairmohayiShyan
yogoShmapluShyamANairna tu punarashakattvajjanaM nirjayet kaH ||##97-5##
prItyA nArAyaNAkhyastvamatha narasakhaH prAptavAnasya pArshvaM
tuShTyA toShTUyamAnaH sa tu vividhavarairlobhito nAnumene |
draShTuM mAyAM tvadIyAM kila punaravR^iNodbhaktitR^iptAntarAtmA
mAyAduHkhAnabhij~nastadapi mR^igayate nUnamAshcharyahetoH ||##97-6##
yAte tvayyAshu vAtAkulajaladagaLattoyapUrNAtighUrNa\-
tsaptArNorAshi magne jagati sa tu jale sambhramanvarShakoTIH |
dInaH praikShiShTa dUre vaTadalashayanaM ka~nchidAshcharyabAlaM
tvAmeva shyAmaLA~NgaM vadanasarasijanyastapAdA~NgulIkam ||##97-7##
dR^iShTvA tvAM hR^iShTaromA tvaritamabhigataH spraShTukAmo munIndraH
shvAsenAntarniviShTaH punariha sakalaM dR^iShTavAn viShTapaugham |
bhUyo.api shvAsavAtairbahiranupatito vIkShitastvatkaTAkShai\-
rmodAdAshleShTukAmastvayi pihitatanau svAshrame prAgvadAsIt ||##97-8##
gauryA sArdhaM tadagre purabhidatha gatastvatpriyaprekShaNArthI
siddhAnevAsya dattvA svayamayamajarAmR^ityutAdIn gato.abhUt |
evaM tvatsevayaiva smararipurapi sa prIyate yena tasmA\-
nmUrtitrayyAtmakastvaM nanu sakalaniyanteti suvyaktamAsIt ||##97-9##
tryaMshe.asminsatyaloke vidhiharipurabhinmandirANyUrdhvamUrdhvaM
tebhyo.apyUrdhvaM tu mAyAvikR^itivirahito bhAti vaikuNThalokaH |
tatra tvaM kAraNAmbhasyapi pashupakule shuddhasattvaikarUpI
sachchidbrahmAdvayAtmA pavanapurapate pAhi mAM sarvarogAt ||##97-10##
##98 	Meditation on nirguna Brahman##
yasminnetadvibhAtaM yata idamabhavadyena chedaM ya eta\-
dyo.asmAduttIrNarUpaH khalu sakalamidaM bhAsitaM yasya bhAsA |
yo vAchAM dUradUre punarapi manasAM yasya devA munIndrA
no vidyustattvarUpaM kimu punarapare kR^iShNa tasmai namaste ||##98-1##
janmAtho karma nAma sphuTamiha guNadoShAdikaM vA na yasmin
lokAnAmUteya yaH svayamanubhajate tAni mAyAnusArI |
bibrachChaktIrarUpo.api cha bahutararUpo.avabhAtyaddhutAtmA
tasmai kaivalyadhAmne pararasaparipUrNAya viShNo namaste ||##98-2##
no tirya~nchanna martyaM na cha suramasuraM na striyaM no pumAMsaM
na dravyaM karma jAtiM guNamapi sadasadvApi te rUpamAhuH |
shiShTaM yatsyAnniShedhe sati nigamashatairlakShaNAvR^ittitastat
kR^ichChreNAvedyamAnaM paramasukhamayaM bhAti tasmai namaste ||##98-3##
mAyAyAM bimbitastvaM sR^ijasi mahadaha~NkAratanmAtrabhedai\-
rbhUtagrAmendriyAdyairapi sakalajagatsvapnasa~Nkalpakalpam |
bhUyaH saMhR^itya sarvaM kamaTha iva padAnyAtmanA kAlashaktyA
gambhIre jAyamAne tamasi vitimiro bhAsi tasmai namaste ||##98-4##
shabdabrahmeti karmetyaNuriti bhagavan kAla ityAlapanti
tvAmekaM vishvahetuM sakalamayatayA sarvathA kalpyamAnam |
vedAntairyattu gItaM puruShaparachidAtmAbhidhaM tattu tattvaM
prekShAmAtreNa mUlaprakR^itivikR^itikR^it kR^iShNa tasmai namaste ||##98-5##
sattvenAsattayA vA na cha khalu sadasattvena nirvAchyarUpA
dhatte yAsAvavidyA guNaphaNimativadvishvadR^ishyAvabhAsam |
vidyAtvaM saiva yAtA shrutivachanalavairyatkR^ipAsyandalAbhe
saMsArAraNyasadyastruTanaparashutAmeti tasmai namaste ||##98-6##
bhUShAsu svarNavadvA jagati ghaTasharAvAdike mR^ittikAvat
tattve sa~nchintyamAne sphurati tadadhunApyadvitIyaM vapuste |
svapnadraShTuH prabodhe timiralayavidhau jIrNarajjoshcha yadvad
vidyAlAbhe tathaiva sphuTamapi vikaset kR^iShNa tasmai namaste ||##98-7##
yadbhItyodeti sUryo dahati cha dahano vAti vAyustathAnye
yadbhItAH padmajAdyAH punaruchitabalInAharante.anukAlam |
yenaivAropitAH prA~N{}nijapadamapi te chyAvitArashcha pashchAt
tasmai vishvaM niyantre vayamapi bhavate kR^iShNa kurmaH praNAmam ||##98-8##
trailokyaM bhAvayantaM triguNamayamidaM tryakSharasyaikavAchyaM
trIshAnAmaikyarUpaM tribhirapi nigamairgIyamAnasvarUpam |
tisro.avasthA vidantaM triyugajanijuShaM trikramakrAntavishvaM
traikAlye bhedahInaM tribhirahamanishaM yogabhedairbhaje tvAm ||##98-9##
satyaM shuddhaM vibuddhaM jayati tava vapurnityamuktaM nirIhaM
nirdvandvaM nirvikAraM nikhilaguNagaNavya~njanAdhArabhUtam |
nirmUlaM nirmalaM tanniravadhimahimollAsi nirlInamanta\-
rnissa~NgAnAM munInAM nirupamaparamAnandasAndraprakAsham ||##98-10##
durvAraM dvAdashAraM trishataparimilatShaShTiparvAbhivItaM
saMbhrAmyatkrUravegaM kShaNamanu jagadAChidya sandhAvamAnam |
chakraM te kAlarUpaM vyathayatu na tu mAM tvatpadaikAvalambaM
viShNo kAruNyasindho pavanapurapate pAhi sarvAmayaughAt ||##98-11##
##99 	Praise of the glory of the Lord##
viShNorvIryANi ko vA kathayatu dharaNeH kashcha reNUnmimIte
yasyaivA~N{}ghritrayeNa trijagadabhimitaM modate pUrNasampat |
yo.asau vishvAni dhatte priyamiha paramaM dhAma tasyAbhiyAyAM
tadbhaktA yatra mAdyantyamR^itarasamarandasya yatra pravAhaH ||##99-1##
AdyAyAsheShakartre pratinimiShanavInAya bhartre vibhUte\-
rbhaktAtmA viShNave yaH pradishati havirAdIni yaj~nArchanAdau |
kR^iShNAdyaM janma vA mahadiha mahato varNayetso.ayameva
prItaH pUrNo yashobhistvaritamabhisaretprApyamante padaM te ||##99-2##
he stotAraH kavIndrAstamiha khalu yathA chetayadhve tathaiva
vyaktaM vedasya sAraM praNuvata jananopAttalIlAkathAbhiH |
jAnantashchAsya nAmAnyakhilasukhakarANIti sa~NkIrtayadhvaM
he viShNo kIrtanAdyaistava khalu mahatastattvabodhaM bhajeyam ||##99-3##
viShNoH karmANi sampashyata manasi sadA yaiH sa dharmAnabadhnA/-
dyAnIndrasyaiSha bhR^ityaH priyasakha iva cha vyAtanotkShemakArI |
vIkShante yogasiddhAH parapadamanishaM yasya samyakprakAshaM
viprendrA jAgarUkAH kR^itabahunutayo yachcha nirbhAsayante ||##99-4##
no jAto jAyamAno.api cha samadhigatastvanmahimno.avasAnaM
deva shreyAMsi vidvAnpratimuhurapi te nAma shaMsAmi viShNo |
taM tvAM saMstaumi nAnAvidhanutivachanairasya lokatrayasyA\-
pyUrdhvaM vibhrAjamAne virachitavasatiM tatra vaikuNThaloke ||##99-5##
ApaH sR^iShTyAdijanyAH prathamamayi vibho garbhadeshe dadhustvAM
yatra tvayyeva jIvA jalashayana hare sa~NgatA aikyamApan |
tasyAjasya prabho te vinihitamabhavatpadmamekaM hi nAbhau
dikpatraM yatkilAhuH kanakadharaNibhR^it karNikaM lokarUpam ||##99-6##
he lokA viShNuretadbhavanamajanayattanna jAnItha yUyaM
yuShmAkaM hyantarasthaM kimapi tadaparaM vidyate viShNurUpam |
nIhAraprakhyamAyAparivR^itamanaso mohitA nAmarUpaiH
prANaprItyaikatR^iptAshcharatha makhaparA hanta nechChA mukunde ||##99-7##
mUrdhnAmakShaNAM padAnAM vahasi khalu sahasrANi sampUrya vishvaM
tatprotkramyApi tiShThanparimitavivare bhAsi chittAntare.api |
bhUtaM bhavyaM cha sarvaM parapuruSha bhavAn ki~ncha dehendriyAdi\-
ShvAviShTopyudgatatvAdamR^itasukharasaM chAnubhu~NkShe tvameva ||##99-8##
yattu trailokyarUpaM dadhadapi cha tatonirgatAnantashuddha\-
j~nAnAtmA vartase tvaM tava khalu mahimA so.api tAvAnkimanyat |
stokaste bhAga evAkhilabhuvanatayA dR^ishyate tryaMshakalpaM
bhUyiShThaM sAndramodAtmakamupari tato bhAti tasmai namaste ||##99-9##
avyaktaM te svarUpaM duradhigamatamaM tattu shuddhaikasattvaM
vyakta~nchApyetadeva sphuTamamR^itarasAmbhodhikallolatulyam |
sarvotkR^iShTAmabhIShTAM tadiha guNarasenaiva chittaM harantIM
mUrtiM te saMshraye.ahaM pavanapurapate pAhi mAM kR^iShNa rogAt ||##99-10# #
##100 	Description of the vision of the Lord##
agre pashyAmi tejo nibiDatarakalAyAvalIlobhanIyaM
pIyUShAplAvito.ahaM tadanu tadudare divyakaishoraveSham |
tAruNyArambharamyaM paramasukharasAsvAdaromA~nchitA~Ngai\-
rAvItaM nAradAdyaivilasadupaniShatsundarImaNDalaishcha ||##100-1##
nIlAbhaM ku~nchitAgraM ghanamamalataraM saMyataM chArubha~NgyA
ratnottaMsAbhirAmaM valayitamudayachchandrakaiH pi~nChajAlaiH |
mandArasra~N{}nivItaM tava pR^ithukabarIbhAramAlokaye.ahaM
snigdhashchetordhvapuNDrAmapi cha sulalitAM phAlabAlenduvIthIm ||##100-2##
hR^idyaM pUrNAnukampArNavamR^idulaharIcha~nchalabhrUvilAsai\-
rAnIlasnigdhapakShmAvaliparilasitaM netrayugmaM vibho te |
sAndrachChAyaM vishAlAruNakamaladalAkAramAmugdhatAraM
kAruNyAlokalIlAshishiritabhuvanaM kShipyatAM mayyanAthe ||##100-3##
uttu~NgollAsinAsaM harimaNimukuraprollasadgaNDapAlI\-
vyAlolatkarNapAshA~nchitamakaramaNIkuNDaladvandvadIpram |
unmIladdantapa~NktisphuradaruNatarachChAyabimbAdharAntaH\-
prItiprasyandimandasmitashishirataraM vaktramudbhAsatAM me ||##100-4##
bAhudvandvena ratnojvalavalayabhR^itA shoNapANipravALe\-
nopAttAM veNunALIM prasR^itanakhamayUkhA~NgulIsa~NgashArAm |
kR^itvA vaktrAravindre sumadhuravikasadrAgamudbhAvyamAnaiH
shabdabrahmAmR^itaistvaM shishiritabhuvanaissi~ncha me karNavIthIm ||##100-5##
utsarpatkaustubhashrItatibhiraruNitaM komaLaM kaNThadeshaM
vakShaH shrIvatsaramyaM taraLatarasamuddIprahArapratAnam |
nAnAvarNaprasUnAvalikisalayinIM vanyamAlAM vilola\-
llolambAM lambamAnAmurasi tava tathA bhAvaye ratnamAlAm ||##100-6##
a~Nge pa~nchA~NgarAgairatishayavikasatsaurabhAkR^iShTalokaM
lInAnekatrilokIvitatimapi kR^ishAM bibhrataM madhyavallIm |
shakrAshmanyastataptojvalakanakanibhaM pItachelaM dadhAnaM
dhyAyAmo dIptarashmisphuTamaNirashanAki~NgiNImaNDitaM tvAm ||##100-7##
UrU chArU tavorU ghanamasR^iNaruchau chittachorau ramAyA
vishvakShobhaM visha~Nkya dhruvamanishamubhau pItachelAvR^itA~Ngau |
AnamrANAM purastAnnyasanadhR^itasamastArthapALIsamudga\-
chChAyAM jAnudvayaM cha kramapR^ithulamanoj~ne cha ja~Nghe niSheve ||##100-8##
ma~njIraM ma~njunAdairiva padabhajanaM shreya ityAlapantaM
pAdAgraM bhrAntimajjatpraNatajanamanomandaroddhArakUrmam |
uttu~NgAtAmrarAjannakharahimakarajyotsnayA chA.ashritAnAM
santApadhvAntahattrIM tatimanukalaye ma~NgalAma~NgulInAm ||##100-9##
yogIndrANAM tvada~NgeShvadhikasumadhuraM muktibhAjAM nivAso
bhaktAnAM kAmavarShadyutarukisalayaM nAtha te pAdamUlam |
nityaM chittasthitaM me pavanapurapate kR^iShNa kAruNyasindho
hR^itvA niHsheShatApAnpradishatu paramAnandasandohalakShmIm ||##100-10##
aj~nAtvA te mahattvaM yadiha nigaditaM vishvanAtha kShamethAH
stotraM chaitatsahasrottaramadhikataraM tvatprasAdAya bhUyAt |
dvedhA nArAyaNIyaM shrutiShu cha januShA stutyatAvarNanena
sphItaM lIlAvatArairidamiha kurutAmAyurArogyasaukhyam || ##100-11##